Qoşqar

Şəhid müəllim Ömərov Qoşqar Səxavət oğlu 1994-cü il fevralın 9-da Kürdəmir rayonu, Şilyan (Qarasu) kəndində müəllim ailəsində anadan olub. 2015-ci ildə ADPU-nun “Riyaziyyat-informatika müəllimliyi” ixtisasının bakalavr pilləsini, 2018-ci ildə AZMİU-nun “İnformasiya texnologiyaları” ixtisası üzrə magistratura pilləsini bitirib.

2016-cı il “Hədəf Kursları” MMC-nin müəllimlərin işə qəbulu imtahanında yüksək bal toplayaraq pedaqoji fəaliyyətə başlayıb. 2018-ci ildə MİQ imtahanında 57 bal toplayaraq Masazır kənd 5 nömrəli məktəbdə riyaziyyat müəllimi kimi işə qəbul olunub.

2020-ci il sentyabrın 21-də çağırışla ordu sıralarına qoşulub, sentyabrın 27-də Füzuli cəbhəsində müharibəyə qatılıb. Döyüşlərdə xüsusi fəallığı və igidliyi ilə seçilərək kəşfiyyat bölüyünə daxil edilib.

2020-ci ilin 4 noyabrında Şuşanın Daşaltı kəndi ətrafında gedən döyüşlərdə şəhidlik zirvəsinə yüksəlib.

Ali baş komandanın əmri ilə ölümündən sonra “Vətən uğrunda”, “Cəsur döyüşçü”, “Şuşanın azad olunmasına görə”, “Füzulinin azad olunmasına görə”, “Xocavəndin azad olunmasına görə” medalları ilə təltif olunmuşdur.

Vətən müharibəsi müəllim şəhidi Qoşqar Ömərovun xatirəsinə həsr olunan

“Qoşqar – Riyaziyyat və Məntiq” yarışı

Təşkilatçılar:    Azərbaycan Memarlıq və İnşaat Universiteti,  Hədəf  Şirkətlər Qrupu, MUSİAD Azərbaycan
Tərəfdaşlar: Azərbaycan Özəl Təhsil Müəssisələri Assosiasiyası, OYAL, Sınaq İmtahan Mərkəzi,  kitabevim.az, SinKOD
Yarışın keçiriləcəyi tarix:  10 mart 2024-cü il

Son qeydiyyat: 07 mart 2024-cü il

 Vətən müharibəsi müəllim şəhidi Qoşqar Ömərovun xatirəsinə həsr olunan

“Qoşqar – Riyaziyyat və Məntiq” yarışının qaydaları:

1. Yarışda orta ümumtəhsil məktəblərinin və liseylərin Azərbaycan bölməsində təhsil alan 5-6-7-8-ci sinif şagirdləri iştirak edə bilər.

2. Yarışda iştirak etmək istəyən şagirdlər “Hədəf Kursları” MMC-nin filiallarından ödənişsiz olaraq buraxılış vərəqəsi əldə etməlidirlər.

3. Hər sinif üzrə sual kitabçası 15 riyaziyyat, 15 məntiq fənninə aid olmaqla 30 qapalı test tapşırığından ibarətdir.

4. İmtahan müddəti 60 dəqiqədir.

5. Maksimum bal 100 baldır.

6. Hər bir fənn üzrə doğru cavabların sayından səhv cavabların sayının ¼-i çıxılır.

7. Yarışın nəticələri 7 iş günü müddətində açıqlanır.

8. Hər sinif üzrə ilk 5 yerin qalibləri mükafatlandırılır

9. Qaliblər “Fəxri fərman” və müxtəlif qiymətli hədiyyələrlə təltif edilirlər

PROQRAMI

1. Yarışın keçirilməsi üçün rəsmi start verilməsi – 15 yanvar 2024-cü il

–  Müvafiq qurumlara (dövlət və ya özəl, sponsor və s) məktublar göndərilir

–  Dizayn, tərtibat, texniki işlər də bu mərhələdə həll olunur

2.  Təbliğat müddəti – 09 fevral – 05 mart 2024-cü il

–  Bu müddət ərzində məktəb gəzintiləri baş tutur. Məktəblərə plakat və bukletlər paylanılır, şagirdlərə layihənin  mahiyyəti izah edilir.

– . İştirakçı  şagirdlərin sayı dəqiqləşdirilir.

–  mətbuat bildiriləri da bu mərhələdə həyata keçirilir.

3. Yarışın keçiriləcəyi tarix  – 10 mart 2024-cü il

–  Yarışın  birinci (imtahan) mərhələsi Bakı, Sumqayıt, Xırdalan və Kürdəmir  şəhərlərindəki imtahan binalarında təşkil olunur. Digər rayonlardan qoşulanlar da bu binalarda yarışda iştirak edirlər

–  Bu mərhələdə şagirdlərə cavablandırmaları üçün 1 saat müddətində 30 sual təqdim olunur.

4. Qaliblərin mükafatlandırılması – 15 (?) mart 2024-cü il

–  Bağlanış mərasimi və qaliblərin mükafatlandırılması Bakı şəhərində təşkil olunur.

– qalibi olmuş şagirdlər, onların müəllimləri və digər qonaqlar  mükafatlandırma mərasiminə dəvət edilir

– Hər sinif üzrə ilk 5 yerin sahibləri diplom və qiymətli hədiyyələrlə mükafatlandırılır.